التشاراك أنواعه وأسراره- ملف كامل و متكامل من ايدي الشاف لبنى-

التشاراك أنواعه وأسراره- ملف كامل و متكامل من ايدي الشاف لبنى-

1- تشاراك مسكر:

#لبنى و نواصل معاكم سلسلة الدروس .بزاف الي عندهم مشكل مع التشاراك المسكر.كاين الي يجيهم الحشو لداخل يابس.كاين عندها مشكل السكر ما يشدلهاش في حبه التشاراك.كاين الي شكل التشاراك كيما تقوسو ما يجيهاش هلال..اليوم ان شاء الله نجاوبكم على كل الاسئله الخاصه بالتشاراك..
أصل الكلمة" تشاراك مسكر" عثمانية ومعناها الهلال.. والله اعلم

#العجينة :
3 كيلات فرينة نضيفولها رشة ملح و كيلة سمن ذايب و بارد.دايما نقولكم سمن بارد باش ما يكلحكش الماء.خلطيهم مليح بيديك من بعد اجمعيه بخليط ماء الزهر +ماء .تتحصلو على عجينه تكون طريه.
#كيفاش تعرفو بلي ما تزيدولهاش الماء.لازم كي تقوسوها ما تتشققش.
#خليو العجينة تريح على الاقل نصف ساعه.لكن افضل تخليوها تبات باش تتحصلو على نتيجه روعه و تعطيكم الطوع في الخدمه.
#الحشو :
- 3كيلات لوز مرحي أو كاوكاو + كيلة ناقصة قدر اصبع سكر عادي و ملعقة صغيرة فانيلا
- ملعقة كبيرة سمن ذائب(دايما نستعملو لكل 100 غ لوز ملعقة كبيرة سمن.لبنى
#هنا السمن ضروري باش يجيكم الحشو طري) نخلطوهم مليح و نزيدو ماء الزهر و اعجنوه مليح حتى يدخل السكر في اللوز باش يجيكم تشاراك معسل من داخل..لبنى
#ما.لازمش يكون الحشو يتلاصق خطراش يكون سبب في خروجو من العجين و يتحرقلكم .
#ما ديروهش ناشف يتفتت لانو كي يطيبلكم الحشو يجي يابس.

#طريقة التشكيل :
- نقسمو العجين الى كريات 30 غ ،نشكلو كل كرية على شكل حربوش ثم نحلوها بسمك 2 ملم و طول 12 سم ،نضع الحشو على الطرف العجين ونلفوها كي نلحقو لطرف الاخر نعبزو مليح على العجين بالاصبع ونغلقو اللفة .. لبنى
#هنا نعبزو عليها باش كي طيب ما تنفخش وما تجيش هاذيك الحاشيه تبان .
#الحشو ما لازمش يخرجلكم على الاطراف لانو كي يطيب التشاراك تدي لون ذهبي الاطراف يتحرقولكم.
#نشكلو التشاراك على شكل هليلات نغطيوهم و نخليوهم يريحو نصف ساعه قبل ما نطيبوهم باش يحافظو على شكلهم . لبنى
- نكملو كل العجينة بنفس الطريقة و نطيبوهم في فرن ساخن مسبقا على درجة 180 درجة لمدة 20 دقيقة تقريبا حتى يصبح لون التشاراك ذهبي من الاسفل فقط .لازم تعسوه في الطياب ما لازمش يتحرقو الاطراف.لبنى
نخليو تشاراك يبرد مليح و ننتقل لعمليه الطلي بالسكر
#طريقة الطلي :
اولا نحضر الشربات في وعاء نخلط 200غ السكر الناعم مع 400 غ ماء الزهر و2 مغارف الفرينة ونخلط حتى نتحصل على خليط متجانس.لبنى
#هنا نستعملو هذا الخليط باش يشد مليح السكر في تشاراك ومن جهة اخرى ما يجيش يابس.
#نحطو في وعاء سكر ناعم مغربل زوج مرات.
#نحطو حبات التشاراك في الشربات نخليهم يقطرو قليلا ما لازمش يطولو في شربات دخلوهم و خرجوهم .كي يقطرو نحطوهم في السكر الناعم نحركوهم فيه مليح ثم نخرجوهم يريحو ربع ساعة ونعاودو ندخلوهم ثم نمسحو الزائد من السكر براحة اليد من الاسفل و ندورو اصبعين السبابة والابهام على تشاراك حتى نحيو السكر الزايد لبنى
#قبل ما نحطوهم في كيسات التقديم نرشوهم بسكر ناعم باستعمال صفاية.. لبنى
#هاذي الوصفه تقدرو ديرو بيها كعيكعات مسكرين و تقدرو ديرو بيها تشاراك الطليه.... لبنى

2- تشاراك الطلية والشكولاطة ،

نقدر نستخدم العجينة السابقة أو العجينة السحرية او هذه يابعد:
#العجينة:
250غ مرغرين+3مغارف سكر ناعم+500غ فرينة دخليها مليح+ رشة ماء الزهر و اعجنيها مليح (حوالي فنجان ماء الزهر)
#الحشو: 3كيلات كاوكاو + نص كيلة سكر+ فانيليا+ مغرفة مرغرين+ ماء الزهر
#الطلية:
كيلة كل من : حليب+ ماء الزهر+ زيت +ملون غذائي ابيض+ ملون غذائي وردي و نبدا نزيد في السكر الناعم حتى تثقال + كيلة عصير الليمون و نواصل السكر حتى تولي طلية ثقيلة.. لبنى
#الشكولاطة :
نذوب الشكولاطة ونغمس نصف تشاراك في شكولاطة ( بيضاء - سوداء) ونصف الاخر نغمسو في كونفيتيرثم ( كاوكاو - قوفريط- فايتيين...) لبنى

3-  تشاراك الكاوكاو (العريان):

#الكيلة المستعملة تاع لابال 250g تخدملك حوالي 35 حبة
3كيلات فرينة + 1 كيلة سمن و زيت(مخلطين، تحبي تديري زبدة ذايبة)+ 3 ارباع الكيلة سكر ناعم( يعني كيلة غير ربع)
+فاني + بشور حبة قارص + حبة بيض +قرصة خميرة الحلوة + خليط ماو مازهر..
#الحشوة
3كيلات لوز/ كاوكاو + كيلة ناقص اصبع سكر عادي + شوية مارغرين طرية او سمن + ماء زهر
#خلطي الفرينةوالسكرو الفاني ولخميرةوقرصة ملح وفي وسط الخليط ضعي السمن ذايب و باردوالبيض والماوماء زهر و طمي العجينة. اتركي العجينة ترتاح علي الاقل 2سا شكلي كرات 35غ والحشوة 15 غ شكليه تم ادهنيه بصفار البيض ورمديه اما كاوكاو افيلي ، اما كاوكاو مرحي سواء بالقشور او بلا قشور شوفي الصور تلقايني حطيتهم كل ، وحبيبتي تحبي تطيبيه بلا كاووكاو وثم تغمسيه في كونفيتير ثم كاوكاو ،لبنى
#طريقة اخرى حلي العجينة وقطعي مثلثات وحطي الحشوة في قاعدة المثلث ولفي رح يجي شكلو رائع... لبنى
#لما تطيبيهم اما ترشي سكر رطب أو تعسليهم خفيف فقط.. لبنى

4- العجينة السحرية للتشاراك:

#كيلة سمن باردة وذائبة+ كيلة زيت+كيلة حليب+ 2 ملاعق سكر ناعم+ 1/2 فنجان ماء زهر+ رشة ملح+ فانيليا+ فرينة حسب الحاجة
#الحشو:
اختياري (لوز كاوكاو جوز الهند):3 كيلات لوز+كيلة سكر
فانيليا+قشور قارص (ليمون)+قرفة+رشة ماء زهر
#نخلط جميع السوائل ثم الفانيلا السكر المسحوق، الملح ونجمع بالفرينة حتى الحصول على عجينة طرية نتركها ترتاح على الأقل 2 ساعات
#في الوقت اللذي ترتاح فيه العجينة نحضر الحشو بالنسبة للوز ممكن استعماله بالقشور نخلط المكونات ونجمعه بقليل من ماء زهر.. لبنى

5-  هليلات القوفريط / بالكاوكاو

#العجينة:
كأس زبدة ذائبة+ كأس زيت+كأس حليب+ نصف كأس سكر+ نصف كيس خميرة+ رشة فاني+ فرينة
#للحشوة: نحب نحشيها شامية وحدها او نضيفلها كاوكاو وماكسن ونعجن بصفار بيضة.
#للتزيين : ڤوفريط وعسل او كونفيتير

نخلط كل المواد السائلة ثم نضيف الخميرة و سكر و رشة ڤاني ثم الفرينة حتى نتحصل على عجية طرية
نقطع بالقطاعة دوائر ... نضع في وسط الدائرة قليلا من الشامية و نشكل هلال ،نضع الهليلات في الفرن ،ما تحمروهمش بزاف خلوهم doré
بعد الطهي خلوهم يبردو ثم اغطسيهم في العسل و رمديهم في الڤوفريط ( من الاحسن ذوق ڤاني ).. لبنى
# نفس الشيء نرمد في كاوكاو واخيرا نرسم خطوط بالشكولاطة ، لبنى